ҚҰРМЕТТІ ӘРІПТЕСТЕР!
Сізді және Сіз арқылы ұжым қызметкерлерін Орал обаға қарсы күрес станциясы ұжымының атынан Ұлыстың ұлы күні – «Наурыз» мерекесімен шын жүректен құттықтаймын.
Шуақты көктемнің алғашқы мерекелерінің бірі – асыл аналарымызға арналса, күллі мұсылман халықтарына жаңа жылдың бастауы саналатын «Наурыз» мерекесін де шат көңілмен қарсы алудамыз.
Күні мен түні теңескен Наурыз – жаңару мен жасару айы. Наурыз – табиғатты түлетіп, тұрмысты түзететін, тіршілік бүр жарған көктем мен еңбек тойы. Жаңа жылдың жаршысындай бұл күнді халқымыз ақ тілеудің, пәк пейілдің күні деп бекер айтпаса керек.
Ата дәстүрінде бұрын араздасқан ағайын дос жаранның өзі қасиетті той үстінде татуласып, бірін-бірі дәмге шақырып өкпе назды ескі жылға еншілетіп, жаңа жылдың табалдырығын жарқын жүз, жақсы тілекпен аттаған.
Елбасымыздың салиқалы саясатының арқасында елімізде жүздеген ұлт пен ұлыстардың өкілдері бір-бірімен тату-тәтті, берекелі өмір сүріп келе жатыр. Бұл тұрғыда Әз Наурыздың адам баласын ізгілік пен сыйластыққа, ынтымаққа тәрбиелейтін тереңнен тартар ежелгі қасиеті баршамыздың бойымызға дарып, өз өміріміздің салтына айнала бергей.
Ел игілігі үшін жасалатын барлық бастамаларыңызға сәттілік, отбасыларыңызға амандық, құт-береке, бақыт тілеймін.
Ұлысымыз оң, ақ мол болсын, ағайын !

Құрметпен,
станция басшысы Т.Аязбаев